திருஞானசம்பந்தர் - இரண்டாம் திருமுறை - 2.026 - திருநெல்வாயில்(திருவுச்சி)

                                                                    இறைவா..அனைத்தும் நீயே.

                                                                      சர்வம் சிவார்ப்பணம்..,

நாள் : 14- 23. 07.2024

இறைவர் திருப்பெயர்:   உச்சிநாதேஸ்வரர்.  

இறைவியார் திருப்பெயர்: கனகாம்பிகை.  

தீர்த்தம் : கனக தீர்த்தம், கிருபா சமுத்திரம்  

வழிபட்டோர்:சம்பந்தர்,  அப்பர், சேக்கிழார், கண்வ மகரிஷி முதலியோர் 

இது இன்று சிவபுரி எனப்படுகிறது. 

கல்வெட்டுகள் மூன்று படி எடுக்கப்பட்டுள்ளன.

தனது நான்காவது தலயாத்திரையை தில்லை சிதம்பரத்தில் தொடங்கிய திருஞான சம்பந்தர், சிதம்பரம் தலத்தில் இறைவனின் திருக்கூத்தினைக் கண்டு களித்த பின்னர், அருகிலுள்ள வேட்களம், கழிப்பாலை, நெல்வாயில் ஆகிய தலங்களுக்கும் சென்று, ஆங்குள்ள இறைவனைப் பணிந்து வணங்கி பதிகங்கள் பாடுகின்றார். நெல்வாயில் தலத்தின் மீது ஞானசம்பந்தர் அருளிய ஒரு பதிகம் நமக்கு கிடைத்துள்ளது. இந்த தலத்தின்

மீது அப்பர் பிரான் மற்றும் சுந்தரர் அருளிய பதிகங்கள் ஏதும் நமக்கு கிடைக்கவில்லை. தில்லைச் சிதம்பரம் சென்ற அப்பர் பிரான் கழிப்பாலை மற்றும் வேட்களம் தலங்களுக்கும் சென்று பதிகங்கள் அருளிய போதும், நெல்வாயில் தலம் சென்றதாக பெரியபுராண குறிப்பு ஏதும் இல்லை.

தற்போது சிவபுரி என்று அழைக்கப்படும் இந்த தலம், அண்ணாமலை பல்கலைக் கழகத்திற்கு அருகே உள்ளது. சிதம்பரத்திலிருந்து மூன்று கி,மீ, தூரத்தில்,கவரப்பட்டு செல்லும் வழியில் உள்ளது. திருவேட்களம் தலத்திலிருந்து ஒரு கி.மீ, தூரத்தில் உள்ளது. சிதம்பரத்திலிருந்து நகரப் பேருந்து வசதி உள்ளது.இறைவனின் திருநாமம் உச்சிநாதர். உச்சியார் என்று ஞானசம்பந்தர் தனது பாடல்களில் இறைவனை அழைக்கின்றார். தனது குடும்பத்தினருடன், தனது திருமணத்திற்காக ஆச்சாள்புரம் சென்று கொண்டிருந்த திருஞானசம்பந்தர் உச்சிப் பொழுதினில் இந்த தலம் வந்தைடைந்தார் என்றும், அப்போது கோயில் பணியாளர் வேடத்தில் வந்த இறைவன், ஞானசம்பந்தருக்கும் அவருடன் வந்தவர்களுக்கும் உணவு அளித்தார் என்றும் செவிவழிச் செய்திகள் உணர்த்துகின்றன. ஆனால் பெரிய புராணத்தில் இத்தகைய குறிப்பு ஏதும் காணப்படவில்லை. கிழக்கு நோக்கிய ஐந்து நிலைகளுடன் கூடிய இராஜகோபுரம்.பிராகாரத்தில் விநாயகர், சுப்பிரமணியர், பைரவர், பஞ்ச லிங்கங்கள், சனிபகவான், சந்திரன், நடராஜர், சன்னதிகள் உள்ளன. முன்மண்டபத்தில் நவகிராக் சன்னதியும் பள்ளியறையும் உள்ளன. இறைவன் சுயம்பு இலிங்கம். சதுர வடிவினில் ஆவுடையார் உள்ளது. நமக்கு வலது புறத்தில் தெற்கு நோக்கிய அம்பாள் சன்னதி உள்ளது. இறைவியின் திருநாமம் கனகாம்பிகை. திருமால், பிரமன், சரஸ்வதி, அகத்தியர், கண்வ முனிவர் வழிபட்ட தலம். முன் மண்டபத்தில் உள்ள நந்திமண்டபத்தின் தூண்களில் நால்வர் சிற்பங்கள் உள்ளன. கருவறையின் சுவற்றினில் பெருமானின் திருமணக் கோலம் புடைச் சிற்பமாக உள்ளது.அகத்தியருக்கு திருமணக் காட்சி கொடுத்த தலமாக கருதப்படுகின்றது.

மாநிலம் : தமிழ் நாடு 

இத்தலம், சிதம்பரம் இரயில் நிலையத்திலிருந்து தென் கிழக்கே13.5கி.மீ. தூரத்திலும், அண்ணாமலை பல்கலைக்கழகத்திலிருந்து 2-கி.மீ. தூரத்திலும் உள்ளது. சிதம்பரத்திலிருந்து பஸ் வசதி உள்ளது.

 பாடல் எண் : 01

புடையினார் புள்ளி கால் பொருந்திய 

மடையினார் மணிநீர் நெல்வாயிலார் 

நடையின் நால்விரல் கோவணம் நயந்த 

உடையினார் எமது உச்சியாரே.

பாடல் எண் : 02

வாங்கினார் மதில்மேல் கணை வெள்ளம் 

தாங்கினார் தலையாய தன்மையர் 

நீங்கு நீர நெல்வாயிலார் தொழ 

ஓங்கினார் எமது உச்சியாரே.

பாடல் எண் : 03

நிச்சல் ஏத்தும் நெல்வாயிலார் தொழ 

இச்சையால் உறைவார் எம் ஈசனார் 

கச்சை ஆவது ஓர் பாம்பினார் கவின் 

இச்சையார் எமது உச்சியாரே.

பாடல் எண் : 04

மறையினார் மழுவாளினார் மல்கு

பிறையினார் பிறையோடு இலங்கிய 

நிறையினார் நெல்வாயிலார் தொழும் 

இறைவனார் எமது உச்சியாரே.

பாடல் எண் : 05

விருத்தனாகி வெண்ணீறு பூசிய 

கருத்தனார் கனல் ஆட்டு உகந்தவர் 

நிருத்தனார் நெல்வாயில் மேவிய 

ஒருத்தனார் எமது உச்சியாரே.

பாடல் எண் : 06

காரினார் கொன்றைக் கண்ணியார் மல்கு

பேரினார் பிறையோடு இலங்கிய 

நீரினார் நெல்வாயிலார் தொழும் 

ஏரினார் எமது உச்சியாரே.

பாடல் எண் : 07

ஆதியார் அந்தம் ஆயினார் வினை 

கோதியார் மதில் கூட்டு அழித்தவர்

நீதியார் நெல்வாயிலார் மறை 

ஓதியார் எமது உச்சியாரே.

பாடல் எண் : 08

பற்றினான் அரக்கன் கயிலையை 

ஒற்றினார் ஒரு கால் விரல் உற 

நெற்றி ஆர நெல்வாயிலார் தொழும் 

பெற்றியார் எமது உச்சியாரே.

பாடல் எண் : 09

நாடினார் மணிவண்ணன் நான்முகன்

கூடினார் குறுகாத கொள்கையர்

நீடினார் நெல்வாயிலார் தலை 

ஓடினார் எமது உச்சியாரே.

பாடல் எண் : 10

குண்டு அமண் துவர்க்கூறை மூடர் சொல் 

பண்டமாக வையாத பண்பினர் 

விண் தயங்கு நெல்வாயிலார் நஞ்சை 

உண்ட கண்டர் எம் உச்சியாரே.

பாடல் எண் : 11

நெண்பு அயங்கு நெல்வாயில் ஈசனைச் 

சண்பை ஞானசம்பந்தன் சொல் இவை

பண் பயன்கொளப் பாட வல்லவர்

விண் பயன்கொளும் வேட்கையாளரே.

திருச்சிற்றம்பலம்

தென்னாடுடைய சிவனே போற்றி!

எந்நாட்டவர்க்கும் இறைவா போற்றி!

அண்ணாமலை எம் அண்ணா போற்றி!

கண்ணாரமுதக் கடலே போற்றி.

சீரார்ப்பெருந்துறை நம் தேவனடி போற்றி

ஆராத இன்பம் அருளும் மலை போற்றி

பராய்த்துறை மேவிய பரனே போற்றி

சிராப்பள்ளி மேவிய சிவனே போற்றி

ஆரூர் அமர்ந்த அரசே போற்றி

 சீரார் திருவையாறா போற்றி

 ஏகம்பத்துறை எந்தாய் போற்றி

 பாகம் பெணுரு ஆனாய் போற்றி

தென்தில்லை மன்றினுள் ஆடி போற்றி

இன்றெனக்கு ஆரமுதானாய் போற்றி

குவளைக் கண்ணி கூறன் காண்க 

அவளுந் தானும் உடனே காண்க

 காவாய் கனகத் திரளே போற்றி

கயிலை மலையானே போற்றி போற்றி

மீள்பதிவாக:-

திருநாவுக்கரசர்- ஐந்தாம் திருமுறை - 5.42 - திருவேட்களம் - https://tutthamizhthirumurai.blogspot.com/2024/07/542.html

திருஞானசம்பந்தர் - முதலாம் திருமுறை - 1.39 - திருவேட்களம் - https://tutthamizhthirumurai.blogspot.com/2024/07/139.html

சுந்தரமூர்த்தி சுவாமிகள் - திருப்பாட்டு - ஏழாம் திருமுறை - 7.090 - கோயில் ( தில்லை / சிதம்பரம்) - https://tutthamizhthirumurai.blogspot.com/2024/07/7090.html

திருநாவுக்கரசர் - தேவாரம்- ஆறாம் திருமுறை - 6.002 - கோயில் ( தில்லை / சிதம்பரம்) - https://tutthamizhthirumurai.blogspot.com/2024/07/6002.html

திருநாவுக்கரசர் - தேவாரம்- ஆறாம் திருமுறை - 6.001 - கோயில் ( தில்லை / சிதம்பரம்) - https://tutthamizhthirumurai.blogspot.com/2024/07/6001.html

திருநாவுக்கரசர் - தேவாரம்- நான்காம் திருமுறை - 4.81 - கோயில் ( தில்லை / சிதம்பரம்) - https://tutthamizhthirumurai.blogspot.com/2024/07/481.html

திருநாவுக்கரசர் - தேவாரம்- நான்காம் திருமுறை - 4.080 - கோயில் ( தில்லை / சிதம்பரம்) - https://tutthamizhthirumurai.blogspot.com/2024/07/4080.html

திருநாவுக்கரசர் - தேவாரம்- நான்காம் திருமுறை - 4.23 - கோயில் ( தில்லை / சிதம்பரம்) - https://tutthamizhthirumurai.blogspot.com/2024/07/423.html

திருநாவுக்கரசர் - தேவாரம்- நான்காம் திருமுறை - 22 - கோயில் ( தில்லை / சிதம்பரம்) - https://tutthamizhthirumurai.blogspot.com/2024/07/22.html

திருநாவுக்கரசர் - தேவாரம்- ஐந்தாம் திருமுறை - பதிகம் 5.2 - கோயில் ( தில்லை / சிதம்பரம்) - https://tutthamizhthirumurai.blogspot.com/2024/07/52.html

திருநாவுக்கரசர் திருக்குறுந்தொகை- ஐந்தாம் திருமுறை - பதிகம் 5.1 - கோயில் ( தில்லை / சிதம்பரம்) - https://tutthamizhthirumurai.blogspot.com/2024/07/51.html

திருஞான சம்பந்தர் திருக்கடைக்காப்பு - மூன்றாம் திருமுறை - கோயில் (தில்லை / சிதம்பரம்) - https://tutthamizhthirumurai.blogspot.com/2024/07/blog-post.html

திருஞான சம்பந்தர் திருக்கடைக்காப்பு - பதிகம் 1.80 - கோயில் (தில்லை / சிதம்பரம்) - https://tutthamizhthirumurai.blogspot.com/2024/07/180.html